تاجیکستان گذرگاه های مرزی خود با افغانستان را بست

یک مقام دولتی تاجیکستان روز جمعه گفت این کشور به سبب عملیات نظامی برای دستگیری یکی از سرکردگان گروه های مسلح، همه نقاط مرزی را با افغانستان بسته است. به گزارش خبرگزاری رویترز از دوشنبه،خشنود رحمت الله اف سخنگوی گارد مرزی تاجیکستان گفت مرز میان منطقه بدخشان تاجیکستان و بدخشان افغانستان روز سه شنبه بسته شد. به گفته این مقام تاجیک سایر گذرگاه های مرزی دو کشور نیز روز پنجشنبه بسته شد. وی گفت بعد از پایان عملیات ویژه اردو در این مناطق، نقاط مرزی با افغانستان باز خواهد شد. به گفته این منبع، کامیون های تدارکاتی ناتو مجاز به عبور از مناطق مرزی هستند. در جریان درگیریهای چند روز اخیر در منطقه بدخشان تاجیکستان، دوازده نظامی دولتی و سی شورشی طرفدار ایوب بیک اف کشته شدند. امامعلی رحمان رئیس جمهور تاجیکستان روز سه شنبه دستور داد عملیاتی در منطقه خودمختار بدخشان علیه طرفداران ایوب بیک اف که به کشتن یکی از ژنرال های سرویس اطلاعاتی این کشور متهم است، آغاز شود. بعد از بازداشت هشت تن از شورشیان مسلح افغان که برای این عنصر تاجیک کار می کردند، نیروهای نظامی تاجیکستان مرز با افغانستان را بستند. ایوب بیک اف که در سال های 1992 تا 1997 علیه دولت مرکزی تاجیکستان جنگیده بود بعد از امضای پیمان صلح با دولت، به مبارزات خود پایان داد و منصبی دولتی در اختیار گرفت.