د امریکا دفاع وزیر له افغانانو باید بښنه وغواړی

د ویکی لیکس بنسټ اېښودونکی د امریکا د دفاع وزیر څرګندونې رد کړې. د دې ویب پاڼې موسس د افغانستان د جګړې په اړه له خپرو کړیو اسنادو دفاع کوی. د ویکی لیکس موسس جولیان اسانګ، چې خپله اسټرالیایی دى، د شنبې په ورځ یې یو بیان خپور کړ او د رابرټ ګېټس دا خبره یې رد کړه، چې د سندونو خپرېدل د افغانستان پر جګړې ناوړه اغېز کوی، په تېره بیا پر بهرنیو او افغان ځواکونو، ځکه چې ډېر پټ اجرا آت شوی دی. اسانګ د ګیټس د خبرو په اړه وویل، د امریکا دفاع وزیر او نوره حکومتی اداره باید د دې پر ځای چې د استخباراتو غم کوی راوړاندې دې شی او د هغو کارونو تحقیقات دې وکړی چې په افغانستان کې څه شوی دی. اسانګ زیاته کړه چې د امریکا دفاع وزیر د دې پر ځای چې د خپرو شویو سندونو په خپریدو خپګان وکړی ورته پکار دی چې دافغانستان له ولسه بښنه وغواړی. د ویکی لیکس موسس زیاته کړه چې دبشری حقونو په برخه کې به د دوې ویب پانه خپلو هڅو ته دوام ورکوی.