د مهاجرو کورنیو د خپلو ماشومانو د راتلونکی تحصیلی ژوند په اړه اندېښنه؛ له مسؤلینو څخه د لا زیاتې ملاتړ غوښتنه

حجت الاسلام والمسلمین سید نوراحمد مبارز، چې په ایران کې د مهاجرو یو فعال ټولنیز کارکوونکی دی، د ایران د اسلامی جمهوریت څخه د کلونو کوربتوب او همکارۍ له امله مننه کړې او له مسؤلینو یې غوښتی چې د مهاجرو ماشومانو د تعلیم وضعیت ته ځانګړې پاملرنه وکړی.

ښاغلی مبارز د ډېرو کورنیو د اندېښنې په اړه چې د خپلو ماشومانو د تحصیل دوام ته یې لری، له هغو مسؤلینو څخه چې د مهاجرو چارو سره تړاو لری، غوښتی چې د اسلامی، انسانی، اخلاقی او انقلابی لید له مخې، د مهاجرو ماشومانو د تعلیم د خنډونو په لرې کولو کې نوره همکاری وکړی.

په دې پیغام کې راغلی چې د مدارکو ستونزې باید د ماشومانو د زده کړې او علم ته د لاسرسی له حق څخه د محرومیت لامل نه شی، او اړینه ده چې داسې زمینه برابره شی چې هېڅ مهاجر ماشوم د اقامتی شرایطو او مدارکو له امله له تحصیل نه پاتې نشی.

مبارز د مهاجرو ماشومانو د تعلیم په اهمیت ټینګار کړی او ویلی یې دی: «د ماشومانو تحصیل د افغانستان او سیمې راتلونکې پانګه ده»؛ نو له همدې امله د دوی د زده کړې زمینه برابرول کولی شی د نوی نسل لپاره د ښې راتلونکې په جوړولو کې مهم رول ولوبوی.

نوموړی د ایران د اسلامی جمهوریت د رهبرانو په نظر کې د مهاجرو ماشومانو د تعلیم د موضوع د اهمیت په حواله، له مسؤلینو څخه د مهاجرو ماشومانو د تعلیم د حق په ملاتړ کې د دوام غوښتنه کړې ده.

د دې پیغام په پای کې، له هغو ټولو مسؤلینو څخه چې د مهاجرو کورنیو ته د تعلیم د شرایطو او خدمت په برخه کې همکاری کوی، مننه شوې ده.