په ملګرو ملتونو کې د پزشکیان وینا؛ د جګړې په اړه د ایران روایت، پر خپلواکۍ ټینګار او نړۍ ته د مقاومت پیغام

پزشکیان په خپله وینا کې د پام وړ برخه د وروستۍ جګړې پایلو ته ځانګړې کړه او د یو شمېر ایرانی قوماندانانو، ساینسپوهانو او ملکی وګړو، د ښځو او ماشومانو په ګډون، د وژل کېدو په اړه یې خبرې وکړې او پر هغه څه یې ټینګار وکړ چې ایران یې «له ځانه د دفاع او د ځمکنۍ بشپړتیا د ساتنې حق» بولی. هغه همدارنګه د جګړې د قربانیانو د انځورونو په ښودلو سره هڅه وکړه چې د دې نښتو بشری ابعاد د نړۍ د عامه افکارو لپاره لا روښانه کړی.

د ایران ولسمشر په دې وینا کې وویل چې د هغه هېواد خلک به د بهرنیو فشارونو او ګواښونو په وړاندې له خپلو دریځونو څخه شاتګ ونه کړی او ملی خپلواکی او ملی حاکمیت یې د اسلامی جمهوریت د بهرنی سیاست له اساسی اصولو څخه وبلل. هغه ټینګار وکړ چې د تهران له نظره، سیاسی او پوځی فشارونه نه شی کولای پر ایران د غوښتنو د تپلو زمینه برابره کړی.

د پزشکیان د وینا بل مهم محور د هرمز تنګی موضوع وه؛ هغه اوبه‌لار چې د نړۍ د انرژۍ په لېږد کې مهم رول لری او تل د سیمه‌ییزو معادلاتو له حساسو موضوعاتو څخه ګڼل کېږی. د ایران ولسمشر د دې سمندری لارې اهمیت ته په اشارې سره، د هغې د امنیت او اړوندو تحولاتـو په مدیریت کې د ایران پر رول او ځایګی ټینګار وکړ.

کتونکی باور لری چې تهران د ملګرو ملتونو له دې نړیوالې ویناوالۍ څخه استفاده وکړه، څو له څو میاشتو تاوتریخوالی او نښتو وروسته، د جګړې، سیمه‌ییزو مسایلو، ملی امنیت او په منځنی ختیځ کې د ایران د ځایګی په اړه خپل پیغام نړیوالې ټولنې ته ورسوی. په دې چوکاټ کې، د پزشکیان وینا د وروستۍ جګړې په اړه د ایران د رسمی روایت د وړاندې کولو او د خپلواکۍ، امنیت او ملی ګټو په برخو کې د دغه هېواد پر سیاستونو د ټینګار یوه هڅه بلل کېدای شی.

د ایران د ولسمشر وینا همدارنګه وښودله چې تهران د جګړې له امله د رامنځته شویو بشری مسایلو ترڅنګ، ملی پرمختګ او ځواکمنتیا هم د خپل راتلونکی لیدلوری د یوې برخې په توګه مطرح کوی. د ډېرو شنونکو له نظره، دا پیغام څرګندوی چې ایران غواړی ځان د یوه خپلواک هېواد په توګه معرفی کړی؛ هغه هېواد چې د بهرنیو فشارونو او ګواښونو پر وړاندې د خپل حاکمیت او ملی ګټو پر ساتنه ټینګار کوی.

په ټوله کې، د ملګرو ملتونو په عمومی اسامبله کې د مسعود پزشکیان وینا د دې هڅو یوه برخه بلل کېدای شی چې ایران غواړی د جګړې، سیمه‌ییزو تحولاتـو او د نړیوالو اړیکو د راتلونکی په اړه خپل رسمی دریځونه تشریح کړی؛ داسې هڅه چې موخه یې د نړیوالو اړیکو تر ټولو مهمې ویناوالۍ څخه نړیوالو افکارو ته د تهران د پیغام رسول وو.