80 زندانى طالب از زندان پلچرخى رها گردید

مسوولین امنیتى میگویند، که هشتاد زندانیان طالب که میعاد حبس خود راسپرى نموده و یا در دوسیه هایشان الزامیت دیده نشده است، رها گردیدند. بعداز آنکه مسوولیت زندان بگرام به دولت افغانستان سپرده شده، تا کنون بیشتر از 500 تن زندانیان طالب از این زندان رها شده اند. مسوولیت زندان بگرام در ماه سنبله سال روان در حضور مقامات کشور و امریکایى، با پایین آوردن بیرق امریکا و بر افراشتن بیرق افغانستان بر فراز زندان، به نیروهاى داخلی سپرده شد. دگروال دهاتى مسوول امور عامۀ قوماندانى پولیس نظامى امروز (15جدى) به خبرنگاران گفت، که 80 زندانى طالب امروز از زندان بگرام و توقیف خانه مربوط وزارت دفاع ملى در ساحۀ پلچرخى رها گردیدند. وى گفت، که دوسیه هاى این زندانیان سیاسى از سوى کمیته تخصصى که نماینده گان ستره محکمه، لوى سارنوالى، ریاست عمومى امنیت ملى و وزارتهاى داخله و دفاع در آن حضور دارند، بررسى گردیده است. موصوف علاوه کرد، که بعد از بررسى دوسیه این زندان کمیته تخصصى 80 تن از زندانیان طالب که میعاد حبس خود را سپرى نموده و یا در دوسیه هایشان الزامیت دیده نشده اقدام به رهایى آن گردید. دهاتى مى گوید، که زندانیان رها شده باشنده گان لوگر، میدان وردگ، کاپیسا، پروان، پکتیا، خوست و پکتیکا میباشند. به اساس معلومات منبع، قرار است در جریان سال روان بیشتر از 1200 زندانى سیاسى دیگر نیز از زندان بگرام و زندانهاى دیگر رها گردند. گفتنى است، که در حال حاضر سه هزار زندانى در زندان بگرام و400 دیگر در توقیف خانه هاى مربوط وزارت دفاع ملى در ساحۀ پلچرخى زندانى میباشند.