پر پښتنو او بلوڅو جګړه تپل شوې

پر پښتنو او بلوڅانو جګړه تپل شوې ده او دغو دوو قومونو تر ټولو زیات په جګړه کې زیانونه ګالی . دغه څرګندونې د پښتنو او بلوڅو د ملی یووالی په ورځ پرون په هغو غونډوکې وشوې ،چې د همدې ورځې د نمانځنې په هدف په کابل او جلال آباد ښار کې جوړې شوې وې. دغه ورځ ، چې له 1328 لمریز کال راهیسې هرکال د وږی په 9مه، نمانځل کېږی ، پرون هم دکابل ښار په خوشحال خان لېسه او د جلال آباد ښار په شیشم باغ کې ونمانځل شوه . دآزادوقبایلو دسراتاسری شورا رئیس زرجان ، خوشحال لېسه کې جوړې شوې غونډې ته وویل، چې له تېرو څو کلونو راهیسې پښتانه او بلوڅان له ډېرو ستونزو سره مخ دی . زرجان وایی،چې د دې ورځې دنمانځلو هدف دادى،چې ددغو دوو قومونو په منځ کې همغږی رامنځته شی. یاده ورځ ، د جلال اباد په شیشم باغ کې دخدایی خدمتګار انو د مشر خان عبدالغفار خان مقبرې ترڅنګ هم ونمانځل شوه .