کندهار کې له امریکایی پوځیانو سره د ګېټس لیدنه

د امریکا د دفاع وزیر رابرټ ګېټس پرون په کندهار کې له مېشتو امریکایی پوځیانو سره وکتل. افغانستان ته د تازه دمه 30 زره امریکایی پوځیانو یوه برخه په دې سیمه کې ځاى پر ځاى کېږی، چې د طالبانو د ظهور مهمه سیمه ګڼل کېږی. نوموړى به نن په کندهار کې وی، چې په دې وروستیو کې ناامنی په دې ولایت کې پراخه شوې او په کې د پراخو پوځی عملیاتو د پیل خبرې هم کېږی. هغه د پنجشنبې په ورځ په نااعلان شوی سفر کابل ته راغى، تر دې مخکې په بغداد کې و، چې د امریکا د جنګی ماموریت د پاى په مراسمو کې ګډون وکړی. د پنجشنبې په ورځ د امریکایی پوځیانو شمېر، چې په روان میلادی کال کې وژل شوی 326 تنو ته پورته شو. د امریکا د دفاع وزیر تر دې مخکې په کابل کې له جمهور رئیس کرزی سره په یوه غونډه کې وویل، افغانستان ته د 30 زره اضافی عسکرو استول تقریباً پوره شوی دی.