د حج پر مهال د افغان حاجیانو ستونزې

ولسی جرګې د د وشنبې په عمومی غونډه کې د سږنی کال د حج د فریضې د ادا کولو او په دې بهیر کې د شته ستونزو په اړه خبرې اترې وکړې. وکیلانو په دې غونډه کې د سږنی کال د حج د فریضې د اداکولو او په شته ستونزو د بحث ترڅنګ وویل، چې د حج او اوقافو وزارت باید د تېرو کلونو په نسبت افغان حاجیانو ته په سعودی عربستان کې لا اسانتیاوې برابرې کړی. د دوى په وینا، تېرکال په سعودی عربستان کې د حج د فریضې پرمهال د وړو ښوونکو، د اوسېدو لپاره د مناسب ځاى او په خپل وخت دتګ راتګ اسانتیاوو نه شتون هغه ستونزې وې، چې افغان حاجیان ورسره لاس او ګرېوان وو. د ولسی جرګې غړی عبدالسلام قاضی زاده په وینا، تېرکال د حج د مراسمو پرمهاله پیله ترپایه ټولې ستونزې ستونزې وې. د ولسی جرګې بل غړى اسدالله همتیار وایی، دحج د فریضې د اداکولو په وخت کې یو زیات شمېر ښوونکی د پیسو په بدل کې اخیستل شوی، چې له کبله یې افغان حاجیانو د لارښوونې په برخه کې خورا ستونزې لرلې. د ده په وینا، له حاجیانو څخه له وخت مخکې پیسې اخیستل او په ملی بانکونو کې د هغوى نه ساتل د اداری فساد ښکارندوی کوی. د ولسی جرګې غړى مولوی شهزاده شاهد هم ورته ستونزې ته اشاره کوی او زیاتوی،چې د نورو هېوادنو په پرتله په سعودی عربستان کې افغان حاجیان له شته اسانتیاوو نه برخمن کېږی. یو شمېر وکیلانو د بحث ترخنګ غوښتنه وکړه، چې په همدې موخه راتلونکې عمومی غونډې ته د حج او اوقافو وزیرمحمدیوسف نیازى راوغواړی ، چې د دوى پوښتنو ته ځواب و وایی او په دې اړه په راتلونکو پلانونو او تیاریو رڼا واچوی. د ولسی جرګې رئیس محمدیونس قانونی د وکیلانو غوښتنه او پرېکړه په داسې ټکواعلان کړه. ومو غوښتل، چې د وکیلانو دغوښتنو او څرګندونو په اړه د حج او اوقافو وزارت نظر واخلو، خو په وار وار تماسونو هغوى په دې اړه څه ونه ویل. ټاکل شوې ده، چې سږکال به له ټول هېواده له څلویښتو زرو زیات افغانان د حج د فریضې اداکولو لپاره سعودی عربیستان ته سفر وکړی