مرورې ولسوالۍ ته د نویو سرحدی ځواکونو استول

د کونړ چارواکی پاکستان سره نېږدې د دې ولایت مرورې ولسوالۍ ته له وسله والو طالبانو سره تر څو نښتو وروسته د تازه سرحدی پولیسو د استولو خبر ورکوی. د مرورې غاښی کنډو سیمه، چې وېل کېږی پخوا پکې یوازې یو امریکایی مرکز موجود و، یوه اونۍ وړاندې پکې د نښتو پرمهال د دولت وسله والو مخالفینو یوه بهرنۍ الوتکه د ناستې پر وخت غورځولې او څو بهرنیو سرتېرو ته یې مرګ، ژوبلې اړولې وه. د کونړ امنیې قومندان خلیل الله ضیایی وایی، تر وروستیو نښتو وروسته سیمه اوس د سرحدی پولیسو او بهرنیو ځواکونو په واک کې ده خو، دى د ورغلو دې تازه ځواکونو شمېره په ګوته نه کړه. په ختیځ کې د ایتلافی ځواکونو مطبوعاتی اداره بیا، چې وسله والو طالبانو یې د غاښی کنډو له مرکزه د ځواکونو د وېستلو دعوه کوله وایی، پخوا هم غاښی کنډو د سرتېرو له شتوالی پرته له سرحدی ځواکونو سره و او اوس هم دغه ځواکونه پکې مېشت دی. په ختیځ کې د سرحدی ځواکونو قومندان تربیا، بیا هڅو وروسته هم په دې اړه له خبرو ډډه وکړه. د وسله والو طالبانو ویاند ذبیح الله مجاهد بیا، چې اوس هم په غاښی کنډو کې له امریکایی مرکزه د بهرنیو سرتېرو د وېستو دعوه لری، وایی سیمې ته تازه سرحدی ځواکونه ورغلی او د دوى ملګری دې لپاره، چې د شتوالی اړتیا یې نه لیده، له غاښی کنډو څخه بیرته وتی. مروره، چې پاکستان ته په لنډه پوله پرته ولسوالی ده، د ځینو په اند که ناامنې وضعې ته یې چارواکی جدی پاملرنه ونه کړی، ښایی افغان دولت ته کوم لوى سرخوږى رامنځته کړی.