وسله وال طالبان تر زیات تر فشار لاندې دی

دناټو عمومی منشی اندرس فوګ راسموسن د جمعې په ورځ ادعا وکړه چې په افغانستان کې وسله وال طالبان اوس په داسی ډول د شاتګ او سخت فشارپه حال کې دی چې تر دې مخکې هیڅوخت نه و. راسموسن د جرمنی له صدراعظمې انګیلا میرکل سره له کتنې وروسته وویل چې ناټو ځواکونه په دې غور کوی چې د افغانستان د امنیتی چارو مسوولیت له راتلونکی کاله افغان ځواکونو ته وسپاری. مېرمن مېرکل او راسموسن وویل چې دوی په خپلو خبرو کې د لیزبون د غونډې په باب هم وږغېدل چې ټاکل شوې ده د راتلونکی نومبر په نولسمه او شلمه جوړه شی او د ناټو تړون پر ستراتیژیک پلان پکې خبرې وشی. ده همداراز وویل چې تړون به د توغندویی دفاعی سیستم او افغانستان په هکله له روسیې سره همکاری زیاته کړی. ټاکل شوې ده چې روسیه هم خپل استازی په لیزبون کې د ناټو سرمشریزې ته واستوی.