وسله ولو د کندهار محبس یو تن کارکوونکى وواژه

په کندهار ښار کې نامعلومو وسله والو په غلچکی برید کې د کندهار لوى محبس یو تن کارکوونکى غلام حبیب په ډزو سره و واژه. پر نوموړی نن له غرمې مخکې شاوخوا یوولس بجې د کندهار ښار په دویمه حوزه کې د اخوند صاحب جامع جومات ته څېرمه نامعلومو کسانو برید کړى و. د کندهار د والی ویاند زلمى ایوبی د پېښی پخلى کوی او وایی، چې وسله والو برېد کوونکو له سیمې څخه په تېښته بریالی شوی، خو پولیس یې په پلټنې بوخت دی. تر اوسه د نوموړی د وژنې پړه لا چا پر غاړه نه ده اخیتسې او نه هم د کندهار امنیتی چارواکو په دې اړه څه ویلی دی. د یادونې وړ ده، چې د پنجشنبې په ورځ هم نا معلومو وسله والو د پوهنې ریاست د سواد زده کړې مدیریت مرستیال عبدالله خان د کندهار ښار اړوند د برېښنا کوټ په سیمه کی په ډزو سره وژلى و.