فراه کې یو پولیس او څلور وسله وال طالبان ووژل شول

د فراه ولایت په بکوا ولسوالۍ کې د ملی پولیسو او وسله والو طالبانو ترمنځ نښته کې یو پولیس او څلور وسله وال طالبان ووژل شول. ځایی پولیسو رسنیو ته ویلی، چې دغه نښته تېره ورځ د بکوا ولسوالۍ په جلګزی سیمه کې ورسته تر هغې رامنځته شوې وه، چې وسله والو طالبانو په دغه سیمه کې د ناټو ځواکونو پر اکمالاتی کاروان برید وکړ. د فراه ولایت امنیه قومندان محمد فقیر عسکر کلید ته وویل، چې په دغه نښته کې، چې 6 ساعته یې دوام درلود یو د ملی پولیسو سرتېرى او 4 وسله وال طالبان ووژل شول. نوموړی زیاته کړه، په دغه نښته کې د ملا ادریس په نامه د وسله والو طالبانو یو مشهور قومندان هم وژل شوى دى. بلخوا وسله والو طالبانو ادعا کړې، چې په نښته کې یې د ملی پولیسو سرتېرو ته سخت زیان اړولى دى. د ځایی خلکو په وینا، په سیمه کې د ملی پولیسو کمښت د دې لامل شوٰى، چې په دې ولسوالۍ کې د ناامنیو پېښې ډېرې شی. په تېرو 10 ورځو کې په بکوا ولسوالۍ څو ځله د وسله والو طالبانو او پولیسو ترمنځ نښتې شوی دی.