د پوهنې وزارت د 300 تړل شویو ښوونځیو د پرانستې خبر ورکړ

د پوهنې وزارت نوی مرستیال وایی، چې په هېواد کې یې له شپږ سوو څلورویشت ښوونځیو څخه، شا وخوا درې سوه بېرته پرانیستی دی. محمد اصف ننګ، چې پرون د پوهنې وزارت د مسلکی مرستیال په توګه وپیژندل شو، رسنیو ته وویل، چې د نورو تړل شویو ښوونځیو د بیا پرانستې په برخه کې به خپلو هڅو ته دوام ورکوی. نوموړی وویل، چې د هېواد په مسلکی ښوونځیو کې د مسلکی زده کړو د نصاب د پیاوړی کولو هڅې به پیل کړی. ننګ زیاته کړه، چې بېلابېلې حرفې به هم، چې په افغانستان کې دود دی، په تعلیمی نصاب کې شاملې کړی.