جمهور رئیس کرزی دهېواد ملی شورا پرانیستله

جمهور رئیس کرزی نن د چهارشنبې په ورځ پر خپلې وینا له اږدو ناندریو وروسته د هېواد ملی شورا پرانیستله. د ملی شورا د دواړو مجلسو (ولسی جرګې او مشرانو جرګې) غړی د سختو امنیتی تدابیرو په ترڅ کې دکابل په لوېدیځ کې د پارلمان ودانۍ ته رسېدلی دی. په دغو مراسمو کې د افغانستان لپاره د ملګرو ملتونو ځانګړی استازی او یو شمېر نور بهرنیو ډیپلوماتان برخه اخیستې. نوموړی په خپلو خبرو کې وویل: لس کال وړاندې مو، چې کوم سفر پیل کړى و، هغه مهال هېواد وران ویجاړ و او د هېواد ملی اردو د بهرنیانو د مداخلو له امله له منځته تللې وه. نوموړ د اساسی قانون تصویب او د ملی شورا د دوو دورو ټاکنو تر سره کېدل د تېرو لسو کلونو تر ټولو مهمې لاسته راوړنې وبللې او زیاته یې کړه، چې اوس افغانان فرصت لری، چې د خپل هېواد د ملی حاکمیت د ساتنې لپاره کوښښونه وکړی. کرزی وویل: تر راتلونکو څلورو کلونو پورې باید امنیتی مسایل په پوره ډول افغانانو ته وسپارل شی او امنیت باید د افغانستان د دولت لخوا وساتل شی او موازی امنیتی ارګانونو ته پاى ورکړل شی. نوموړی زیاته کړه: موږ باید خپله خپل امنتی وساتو او له مخالفینو سره هم خپله مقابله وکړو. د کرزی په وینا، د هېواد بیا رغونه له سولې پرته نه کېږی او سوله یوازې د جنګ له لارې نه راځی. ده د حضرت صبغت الله مجددی په مشرۍ د سولې د ټینګښت کمېسیون له هڅو مننه وکړه او دغه راز یې د استاد ربانی په مشرۍ د سولې عالی شورا وستایله. نوموړی په خپلو خبرو کې د افغان دولت پر وسله والو مخالفینو غږ وکړ، چې نور له جنګه لاس واخلی او له سولې سره دې یو ځاى شی. افغان امنیتی چارواکو له کابل ښاریانو او حکومتی مشرانو غوښتی، چې د پرانیستې د مراسمو پرمهال دې د ملی شورا شاوخوا سیمو ته له تګ راتګ ډډه وکړی. قانون د ملی شورا د نوې دورې د پرانستنې واک، چې له ولسی جرگې او مشرانوجرگې جوړه ده، جمهور رئیس ته ورکړى دى، خو دا ځل نه یوازې د ولسی جرگې پر جوړښت حقوقی او جنایی ناندرۍ شته، چې د مشرانو جرگې درېیمه برخه غړی هم لا نه دی انتصاب شوی.