په کابل کې یوه تن ځان وژنه وکړه

د کابل ښار په لسمې امنیتی حوزې پورې اړوند د وزیر اکبرخان په سیمه کې یوه تن ځان وژنه وکړه. په سیمه کې یوه عینی شاهد 13 کلن حفیظ الله پژواک خبری اژانس ته وویل، چې یوه تن په وزیر اکبرخان پارک کې ځان په رسۍ په ونې پورې ځوړند کړى و. حفیظ الله، چې د نوموړی کس مړى یې نن مازیګر شاوخوا 4 بجې په خپلو سترګو لیدلى دى، وایی چې دغه کس 25 کلن و. خو دا چې نوموړی کس ولې په ونې پورې ځان ځوړند کړى و، ده یې په اړه معلومات نه درلودل؛ خو زیاته یې کړه چې مړى یې د پولیسو له خوا له سیمې یوړل شو. یوه بل عینی شاهد طلحه چې په سیمه کې دوکان لری، پژواک ته وویل چې شاوخوا 4 بجې یې په سیمه کې د خلکو ترمنځ د یوه تن د ځان وژنې خبره تر غوږ شوه او دى یې هم د کتلو په موخه له دوکان څخه بهر ووت. طلحه وویل: (( خلکو ویل چې په پارک کې یوه کس ځان ځوړند کړى دى، خلک ډېر ور روان وو، زه هم ووتم؛ خو څوک نه و چې دوکان ورته پرېږدم او زه نږدې ورشم.)) پژواک هڅه وکړه، چې په دې اړه د لسمې امنیتی حوزې نظر هم واخلی؛ خو امنیتی مسوولینو ځواب ورنه کړ.