پوتین: باید همه ی اقوام افغانستان در قدرت سهم داشته باشند
ولادیمیر پوتین، رییس‌جمهور روسیه در دیدار با امام‌علی رحمان، رییس‌جمهور تاجیکستان، در دوشنبه گفته است که کشورش می‌خواهد همه‌ی اقوام افغانستان سهم کامل در اداره کشورشان داشته باشند.
رییس‌جمهور روسیه روز سه‌شنبه در دیدار با هم‌تای تاجیکستانی‌اش افزوده است که مسکو در تلاش است تا با طالبان روابط برقرار کند.
پوتین در این دیدار گفت: «ما از هیچ تلاشی برای عادی‌کردن وضعیت در افغانستان دریغ نکرده‌ایم. ما تلاش داریم تا روابط خود را با نیروهای سیاسی که کنترول اوضاع را در افغانستان در دست دارند، تقویت کنیم.»
این در حالی‌ست که روسیه طالبان را تاکنون از فهرست گروه‌های تروریستی خویش خارج نکرده؛ اما با آنان روابط نزدیک دارد و دیپلمات‌‌های طالبان را در مسکو پذیرفته است.
این نخستین سفر خارجی پوتین بعد از آغاز جنگ اوکراین در حالی صورت می گیرد که حکومت‌های روسیه و تاجیکستان بارها از تهدید تروریزم و بی‌ثباتی در مرزهای افغانستان ابراز نگرانی کرده‌اند. از سوی هم به‌طور مشخص تاجیکستان نگران نفوذ گروه‌های تندرو اسلام‌گرای ساکن افغانستان به خاکش است.