مایک مولن: اسامه او ملګری یې پاکستان کې دی

د امریکا د متحده ایالاتو لوی درستیز امیرالبحر مایک مولن د هندوستان او پاکستان له سفر څخه وروسته د یکشنبې په ورځ افغانستان ته راغی. نوموړی په ننګرهار کې یې له خپلو پوځی سرتېرو او په کابل کې یې د ناټو له عمومی قوماندان ډېوېډ پټریوس سره وکتل. هغه له غرمې وروسته په کابل کې خبریالانوته په یوه خبری غونډه کې وویل، چې دوى به ترهغې په افغانستان کې خپل ماموریت ته دوام ورکړی، چې ترڅو ورته په دې هېواد کې اړتیا وی. مایک مولن زیاته کړه، چې دوى اوس هم د القاعدې، چې یوه خطرناکه شبکه ده په لټه کې دی او کوښښ کوی، چې افغانستان یوځل بیا د هغوى په پناه ځای بدل نشی. نوموړی وویل، چې د شنبې په ورځ یې له پاکستانی چارواکو سره خبرې وکړې او ترې یې وغوښتل، چې د تروریزم پر ضد مبارزه کې له دوى سره خپلې هڅې ګړندۍ کړی، ترڅو د القاعدې ریښې له قبایلی سیمو څخه وباسی. هغه یوځل بیا دا خبره تکرار کړه، چې اسامه بن لادن او د القاعدې لوړ پوړی غړی په پاکستان کې دی. د مایک مولن په وینا، نه یوازې دا، چې د دې ډلې مشران په پاکستان دی، بلکې نورې سخت دریځې ډلې هم پکې شتون لری، چې په ونیا یې دوى هڅه کوی، ترڅو یې پټنځایونه له منځه یوسی. مولن د هغو دوه امریکایی سرتېرو په هکله، چې د شنبې په ورځ د لوګرولایت په څرخ ولسوالۍ کې لادرکه شوی وو وویل، چې ده ته هم دا خبر رسېدلی، چې په وینا یې د پیدا کولو هڅې یې روانې دی، خو نشی کولای، چې په اړه یې زیات معلومات ورکړی. ټاکل شوې ده، چې مولن به له یو شمېر ا فغان چارواکو سره د افغانستان د امنیتی وضیعت په اړه هم خبرې وکړی. دا په داسې حال کې ده، چې د تېرې چنګاښ میاشتې په پنځمه هم مایک مولن افغانستان ته راغلی وو او له وجمهوررئیس حامد کرزی سره یې د ارګ په ماڼۍ کې کتلی وو.