عطامحمدنور: د طالبانو پر ځاى له حکمتیار سره د سولې خبرې ګټورې دی

د بلخ والی د وسلوالو طالبانو په پرتله له ګلبدین حکمتیار سره د سولې په اړه خبرې اترې کول ګټورې وبللې. د بلخ والی عطامحمد نور د غویی په 7مه د بلخ ولایت په مقام کې د ولسی جرګې له خوا د ده د ستاینې په اړه جوړه شوې غونډې ته د خبرو پر مهال وویل، چې د سولې روانه پروسه په ټکنی توب پر مخ ځی. د بلخ ولایت په مقام کې د ولسی جرګې له خوا نوموړی ته د هېواد د ښه والی په توګه د ستایلو په موخه غونډه جوړه شوې وه، چې نږدې څلوېښت وکیلانو په کې ګډون درلود. عطامحمد نور یادې غونډې ته د خبرو پر مهال وویل، چې د سولې عالی شورا باید په خپلو طرحو کې بدلون راولی، چې له لارې یې د دولت اساسی او غولول شوی مخالفین په ډاګه شی. نوموړی زیاته کړه، وسلوال طالبان سولې ته په هغه ارزښت قایل نه دی، څومره چې ورته د سولې په روانه پروسه کې اړتیا لیدل کېږی. د هغه په وینا، د وسلوالو طالبانو پر پرتله به د حزب اسلامی ګوند له مشر ګلبدین حکمتیار سره خبرې کول ډېره ګټه ولری. نور وویل: ((سره له دې چې حکمتیار صېب داسې یو څوک دى، چې تل د قدرت په سر کې ځان راوستل غواړی؛ خو بیا هم له طالبانو غوره دى او سولې ته د دوى په پرتله ډېر ارزښت ورکوی.)) نوموړی همداراز د افغانستان تېره لس کلنه دوره له نیمګړتیاوو ډکه وبلله. د هغه په وینا، لا هم تر 2014 کاله پورې وخت شته، چې افغانان سره نږدې شی او د نړیوالو له وتو وروسته دغه هېواد یو ځل بیا د جنګونو په ډګر بدل نه شی. د ولسی جرګې نایب منشی محمدفرهاد عظیمی پژوک اژانس ته د جوړې شوې غونډې په اړه وویل، چې د ولسی جرګې 120 غړو د دغې جرګې ریاست ته د بلخ د والی د ستایلو وړاندیز وکړ او هغوى ومانه. نوموړی زیاته کړه، چې له ولسی جرګې څخه نږدې څلوېښت غړی د بلخ ولایت د ارزونې په موخه راغلی او په ترڅ کې یې د بلخ والی ته ستاینلیک هم ورکړ شو.