د افغانستان د اسلامی جمهوریت جمهوررئیس حامدکرزی د نیمروز ولایت د زرنج په ښار کې ځان مرګی تروریستی بریدونه په کلکو ټکو وغندل. نن یو تن ځان مرګی برید کوونکی د نیمروز ولایت د روغتون په دروازه او دوو نورو ځان مرګو برید کوونکو د زرنج په ښارکې په ځان پورې تړلی چاودیدونکی توکی وچول چې له امله یې زموږ یو شمېر بې ګناه هېوادوال شهیدان او یو شمېر نور ټبیان شول. دری تنه نور ځان مرګی بریدکوونکی او تروریستان چې غوښتل یې د زرنج په ښارکې په تروریستی بریدونو لاس پوری کړی د نیمروز د امنیتی ځواکونو لخوا و وژل شول. حامدکرزی چې دا مهال په سعودی عربستان کې دی دغه تروریستی عملونه یې په کلکه وغندل، وې ویل چې تروریستان او د افغانستان د خلکو دښمنان دومره ذلیل شوی چې حتی د روژې په مبارک میاشت کې چې د خیر او برکت، توبې او عبادت میاشت ده، زموږ د بې ګناه او مسلمانو خلکو له وژلو څخه هم لاس نه اخلی. جمهوررئیس وویل: په روژه لرونکو مسلمانانو باندې برید کول له اسلام سره څرګنده دښمنی ده چې عاملین به یې د افغانستان د خلکو له کرکې او د لوی خدای له عذاب پرته نور څه ترلاسه نه کړی. حامدکرزی د زرنج په ښارکې د لازیاتې مرګې ژوبلې د مخنیوی او د درې تنو ترورستانو د له منځه په لاره کې د نیمروز ولایت د امنیتی ځواکونو زړورتیا ستایی . د هېواد جمهوررئیس د دغو تروریستی بریدونو د شهیدانو کورنیو ته د خپلې ژورې خواخوږۍ او ډاډګیرنې مراتب وړاندې کوی او ټپیانو ته د لوی خدای له درباره د سملاسی روغتیاهیله کوی.