ځایی چارواکو ویلی، چې د بغلان ولایت د دهانه غوری په جوى نو کلی کې تېره شپه د بهرنیو ځواکونو په تر سره شویو عملیاتو کې 6 تنه وسله وال طالبان ووژل شول. د بغلان د امنیه قومندانۍ ویاند احمد جاوېد بشارت کلید ته وویل، چې تېره شپه د قومندان لعل په نوم چې د وسله والو طالبانو یو سمه ییز قومندان دی د نیولو لپاره عملیات په لاره اچول شوی وو، چی د هغه 6 ملګری په دغه عملیاتو کې وژل شوی دی، خو نوموړی نه دی نیول شوی. یادې سرچینې خپل لور ته د مرګ ژوبلې په اړه څه ندی ویلی. بلخوا د وسله والو طالبانو یوه ویاند ذبیح الله مجاهد کلید ته د ټیلفون له لارې په خبرو کې ادعا وکړه، چې تېره شپه یې ملګرو د دهانه غوری د چینو په سیمه کې له ګډو ځواکونو سره نښته کړې، چې په پایله کې د ګډو ځواکونو 2 سرتیری، چې یو یې بهرنی او بل افغان سرتېری دى وژل شوی دی. مجاهد په دغه نښته کې د خپلو 5 ملګرو د وژل کېدو خبر هم ورکړ.