د بادغیس ولایت په مرکز قلعه نو کې د پولیسو پر رېنجر موټر بمی چاودنه شوې، چې له کبله یې یو پولیس او یو ملکی وګړى مړ او 3 نور ټپیان شول. د بادغیس د والی ویاند حاجی شرف الدین د پېښې د پخلی ترڅنګ کلید ته وویل، چې پېښه تېر ماښام شوې او له کبله یې یو پولیس او یو ملکی وګړى مړ او 3 پولیس ټپیان دی. ویل کېږی تر اوسه د پېښې په تړاو څوک نه دی نیول شوی، خو د پولیسو لخوا یې د نیول کېدو هڅې روانې دی. د پېښې پړه وسله والو طالبانو پر غاړه اخیستې او ادعا یې کړې، چې د ملی پولیسو پنځه سرتېری یې په کې وژل دی. په دې وروستیو څو میاشتو کې دا لومړۍ خونړۍ پېښه ده، چې د بادغیس ولایت په مرکز قلعه نو کې رامنځته کېږی. په دې چاودنې سره د قلعه نو اوسېدونکو د امنیتی وضعیت په اړه اندېښنې څرګندې کړی او له امنیتی چارواکو یې د امنیت په ټینګښت کې د لا ډېرو هلو ځلو غوښتنه کړې.