حامد کرزی رئیس جمهوری اسلامی افغانستان حمله تروریستی را که در اثر آن انورالحق "صاحب زاده" مدیر لیسه نوگر خیل ولایت ننگرهار به شهادت رسید، به شدید ترین الفاظ محکوم کرد. به اساس معلومات وزارت معارف، دشمنان ترقی و پیشرفت افغانستان، بعد از ظهر دیروز انورالحق "صاحب زاده" مدیر لیسه نوگر خیل ولایت ننگرهار را در منطقه خواران ولسوالی خوگیانی این ولایت، به شهادت رساندند. حامد کرزی رئیس جمهوری اسلامی افغانستان ضمن محکوم کردن این حمله تروریستی گفت: حملات تروریستی بالای معلمان، شاگردان و خدمتگاران معارف، کار آنانی است که می خواهند افغانها در تاریکی باقی بمانند و احتیاج به دیگران باشند. رئیس جمهور گفت: دشمنان معارف افغانستان باید بدانند که با چنین حملات تروریستی نمی توانند از عزم قوی مردم ما در راستای تعلیم و تعلم فرزندان شان، جلوگیری کنند. حامد کرزی مراتب تسلیت و همدردی عمیق خویش را به خانواده شهید "انورالحق صاحب" زاده ابراز می کند و از درگاه خداوند منان برای آنان صبر و شکیبایی تمنا دارد.