جهنده روضۀحضرت على کرم الله وجهه در شهر مزارشریف مرکز ولایت بلخ، با اشتراک صدها هزار تن طى مراسم خاصى برافراشته شد. این جهنده، حوالى ساعت 10 روز اول سال نو 1390، درحالیکه سرود ملى کشور نواخته میشد و صداى فیر توپ نیز به گوش میرسید، بلند گردید. جهندۀ یادشده، روز اول هر سال بلند میگردد. در مراسم امروزى؛ کریم خلیلى معاون دوم رئیس جمهور، شمارى از اعضاى شوراى ملى، نماینده گان قونسلگریهاى کشورهاى همسایه در مزارشریف، مهمانان دعوت شده از تاجکستان و ازبکستان، و همچنین مردم نقاط مختلف کشور، اشتراک داشتند. معاون دوم رئیس جمهور، قبل از برافراشتن جهنده، در بیانیۀ خود سال نو را از هر لحاظ براى ملت افغانستان مهم خواند. همچنان امروز در منطقۀ کارته سخى کابل نیز مراسم برافراشتن جهنده، با حضورداشت شمار زیادى از مقامات حکومتى و مردم انجام گردید. در روز اول سال نو ، در ولایات دیگر کشور نیز مردم به زیارت ها رفته و این روز را با مراسم مختلف تجلیل مینمایند.