گروه داعش با نشر خبرنامه‌یی، ادعا می‌کند که افراد آنان در مسجد جامع خواجه‌حسن در شهر گردیز مرکز پکتیا، حمله‌های انتحاری را انجام داده‌اند.

گروۀ داعش گفته‌است که افراد آنان در نخست بالای افراد تیراندازی کرده و سپس هم، حمله‌های انتحاری را انجام داده‌اند.

این درحالی‌ست که به روز جمعۀ هفتۀ گذشته، دو حمله انتحاری در مسجد خواجه‌حسن در شهر گردیز ولایت پکتیا رخ داد.

به اساس اطلاعات مسؤولان امنیتی در ولایت پکتیا، در حمله‌های انتحاری روز جمعه، 34 نفر شهید و شمار زیاد دیگر هم زخمی شدند.

گفتنی‌ست که روز گذشته، مسؤولان و اقارب جان‌باخته‌گان حمله‌های انتحاری، قربانیان آن روی‌داد خونین را به خاک سپردند.

حمله انتحاری بالای یک قشر خاص در ولایت پکتیا با محکومیت‌های شدید داخلی و خارجی روبرو شدند و مقام‌های دولتی و حامیان شان به نابودی تروریستان تاکید نمودند.

گفتنی‌ست که این برای نخستین‌بار نیست که گروه داعش در افغانستان شیعیان را هدف قرار می‌دهند،‌ بل‌که قبل از این نیز بالای این قشر، حمله‌های انتحاری زیاد از سوی داعشیان صورت گرفته‌است.