په کندهار ښار کې دوه پولیس ووژل شول

په کندهار ښارکې تېره شپه ناپېژاندو وسلوالو پر پولیسو ډزې کړی او دوه تنه یې پکې وژلی دی. دغه پېښه د کندهار ښار د کابل په دوه لاری سیمه کې د شپې په شاوخوا نهو بجو رامنځته شوه. عینی شاهدانو ویلی،چې څو تنو موټر سایکل سپرو پر پلی پولیسو ډ زې وکړې او یو تن یې پکې ټپی او بل یې وواژه. د کندهار د میرویس روغتون یوه ډاکټر د نوم د نه ښودلو په شرط ویلی کلید ته وویل، چې دوى ته یو ټپی پولیس راوړل شوى و، چې وروسته یې ساه ورکړه. طالب ویاند قاری یوسف احمدی وایی، چې پرون یې د کندهار ولایت په بېلا بېلو چاودنو او بریدونو کې ګڼ شمېر پولیسو ته مرګ ژوبله اړولې ده. د یادونې وړ ده، چې له تېرو څو میاشتو راهیسې کله، چې افغان او ناټو ځواکونو په کندهارکې د نظامی عملیاتو خبرې پیل کړی، په دې ولایت کې د نا امنۍ پېښې هم زیاتې شوې دی. په دې موده کې د ځانمرګو بریدونو او چاودنو ترڅنګ د دولتی مامورینو او قومی مشرانو د ترور پېښې هم زیاتې شوې دی