جمهور رئیس حامد کرزی په کندهار کې تروریستی برید په کلکه وغانده

د افغانستان د اسلامی جمهوریت جمهور رئیس حامد کرزی په کندهار ولایت کې هغه تروریستی برید چې له امله یې زموږ یو شمېر بې ګناه هېوادوالو ته مرګ ژوبله واوښته، په کلکه وغانده. د کندهار والی د دفتر د معلوماتو له مخې، یو ځانمرګی برید کوونکی پرون مازدیګر له چاودېدونکو توکو ډک موټر د کندهار پوهنتون ته څېرمه وچواوه، چې له امله یې زموږ اووه تنه بې ګناه هېوادوال شهیدان او درویشت نور ټپیان شول. د افغانستان د اسلامی جمهوریت جمهور رئیس حامد کرزی دغه تروریستی برید په کلکه وغانده ویې ویل چې د پردیو ګومارل شویو مزدورانو د افغانانو د وژنې او په افغانستان کې د ناامنۍ د رامنځته کولو لپاره یو ځل بیا په نه بخښوونکی جنایت لاس پورې کړ. جمهور رئیس زیاته کړه: د افغانستان د خلکو دښمنان باید پوه شی چې دوی به زموږ د بې ګناه خلکو په وژلو سره هېڅکله خپلو ناوړو ارمانونو ته ونه رسیږی. د افغانستان جمهور رئیس د خپلې ژورې خواشینۍ او ډاډګیرنې مراتب د شهیدانو پاتې کسانو ته څرګندوی او د لوی خدای (ج) له دربار څخه هغوی ته د جمیل صبر او ټپیانو ته د سملاسی روغتیا هیله کوی.