امنیت شورا د 5 طالبانو نومونه له تور لېسته ووېستل

د ملګرو ملتو امنیت شورا له خپلو وسله والو مخالفینو سره د افغانستان د دولت د پخلاینې د هلو ځلو د ملاتړ لپاره د جمعې په ورځ د طالبانو د پنځو غړیو نومونه له تورلېسته وه اېستل. افغان حکومت د سولې د ملی مشورتی جرګې له پرېکړو وروسته هڅې پیل کړې، چې د ملګرو ملتو امنیت شورا قانع کړی، چې له خپل تور لېسته د لسو وسله والو طالبانو نومونه وباسی، خو دې شورا یوازې د پنځو کسانو نومونه ایستلی دی. د امنیت شورا هغې کمېټې، چې د طالبانو او القاعده پرضد د بندیزونو څارنه کوی، وویل، هغه کسان، چې نومونه یې له تور لېسته اېستل شوی تر 2001 پورې یې د طالبانو د رژیم لپاره کار کاوه . د دې کمېټې په وینا په دغو پنځو کسانو کې د عبدالحکیم مجاهد (چې په نیویارک کې د طالبانو استازى و)، محمد اورنګ (د کانونو پخوانی مرستیال وزیر)،، عبدالسلام ضعیف (په پاکستان کې د طالبانو سفیر)،عبدالستار پکتین (چې په بهرنیوچارو وزارت کې یې کار کاوه او یوه موده د عامې روغتیا وزارت مرستیال و) او دوه وژل شوی طالبان لکه عبدالصمد خاکسار او د بامیانو پخوانى والی محمداسلام محمدی شامل دی. پر دې اساس امنیت شورا یوازې درې پخوانی طالب چارواکی له تور لېسته اېستلی، چې هغه هم په کابل کې اوسی او د څارونکو په وینا د کرزی د سولې او پخلاینې له بهیر سره ډېره مرسته نه شی کولی.