‏وزارت تحصیلات عالی طالبان برای هزاران «مدرسه ای» مدرک لیسانس و ماستری می دهد

وزارت تحصیلات عالی طالبان اعلام کرده است که به 26 هزار طلبه و «عالم دینی» پس از اخذ امتحان مدرک لیسانس و ماستری اعطا می‌کند.

این وزارت با نشر اعلامیه‌‌ای گفته است که روند اخذ این امتحان روز شنبه، (22 جدی) آغاز شده و برای شش روز ادامه خواهد داشت.

به گفته‌ی وزارت تحصیلات عالی طالبان این امتحانات در 31 ولایت کشور برگزار می‌شود و به 15 هزار طلبه و عالم دینی مدرک ماستری (عالمیه) و به 11 هزار نفر دیگر مدرک لیسانس (عالیه) داده می‌شود.

ندامحمد ندیم، وزیر تحصیلات عالی طالبان گفته است که این امتحانات برای مشخص‌شدن سطح علمی «علما» راه اندازی شده است.

گفتنی‌ست که طالبان در بیش از سه سال اخیر ده‌ها مدرسه دینی در افغانستان ایجاد کرده‌اند و تلاش می‌‌کنند جوانان را به این مدرسه‌ها جذب کنند.