حامد کرزی، رییس‌جمهور پیشین ، و عبدالله عبدالله، رییس شورای عالی مصالحه‌ ملی حکومت پیشین کشورمان، با آسیب‌دیدگان زمین‌لرزه‌ی دیشب در شمال افغانستان ابراز همدردی کردند.

زمین‌لرزه‌ای با قدرت 6.3 ریشتر دیشب ولایت‌های شمال افغانستان را لرزاند.

براساس آمار وزارت صحت طالبان، براثر این زمین‌لرزه در بلخ و سمنگان دست‌کم 20 نفر جان باخته و 534 نفر دیگر زخمی شده‌اند.

کرزی با انتشار پیامی در ایکس ابراز امیدواری کرده است که تاجران و سازمان‌های امدادرسان ملی و بین‌المللی به آسیب‌دیدگان زمین‌لرزه کمک کنند.

عبدالله عبدالله نیز در پیامی گفته است: «از نهادهای امدادرسان و شهروندان توانمند کشور صمیمانه درخواست می‌نماییم تا هرچه سریع‌تر برای یاری‌رساندن به آسیب‌دیدگان اقدام نموده و وظیفه‌ی انسانی خود را در جهت حفظ جان و کمک به هم‌وطنان ایفا نمایند.»

• منبع: خبرگزاری افغان ایرکا
• لینک کوتاه

تگ‌ها:

• #کرزی
• #عبدالله عبدالله
• #زلزله