په لښکرګاه کې دسړک جوړونې دامنیتی کمپنۍ اته ساتونکی ووژل شول

د هلمند په لښکرګاه ښار کې تېره شپه د وسلوالو طالبانو په یوه برید کې د یوې خصوصی امنیتی کمپنۍ اته ساتونکی ، چې دسړک جوړولو کمپنۍ ساتنه یې کوله ، وژل شوی دی. د هلمند د والی ویاند داوود احمدی د تلې په 26مه، وویل چې دغه پېښه تېره شپه په یوولسو بجو د لښکرګاه دوراهۍ ته نږدې دسنګین ولسوالۍ پر لاره رامنځته شوې ده. هغه زیاته کړه چې وسلوالو طالبانو په دغه سیمه کې د امنیتی کمپنۍ د ساتوونکیو پر پوستې برید کړى ، اته ساتونکی یې وژلی او درې نور یې ټپیان کړی دی. د نوموړی په وینا، د ساتوونکیو په ځوابی برید کې وسلوالو طالبانو ته هم مرګ ژوبله اوښتې، خپل مړی یې له ځانه سره وړی او یواځې یو جسد یې په سیمه کې پاتې دى . ددې ولایت دامنیه قوماندانۍ د امنیت آمر سمونوال کمال الدین شېرزى بیا وایی چې کېداى شی د ساتوونکیو ترمنځ خپلمنځی جګړه رامنځته شوې وی. د هغه په وینا، په دې نښته کې نهه ساتونکی وژل شوی او دوه یې نادرکه دی ، چې په اړه یې پلټنې پیل شوې دی. طالب ویاند قاری یوسف احمدی وایی چې پر یادې شوې پوستې ددوى ملګرو برید کړى او 14 پولیس یې وژلی دی .