بادغیس کې د طالبانو یو لوړ پوړى قومندان ووژل شو

ځایی چارواکو په بادغیس ولایت کې د ایتلافی ځواکونو د هوایی برید په ترڅ کې د یوه طالب قومندان د وژل کېدو خبر ورکړ. چارواکی وایی، چې دغه پېښه تېره ورځ وروسته ترهغې رامنځته شوه، چې د ایتلافی ځواکونو الوتکې په بالامرغاب ولسوالۍ کې د ځایی طالبانو یو مشهور قومندان ملا تورجان، چې پر موټر سایکل سپور و په نښه کړ. د بادغیس ولایت امنیه قومندان سمونوال عبدالجبار وایی: ملا تورجان په بالامرغاب ولسوالۍ کې د طالبانو له مشهورو قومندانانو څخه و، چې ډېرى بریدونه د همده لخوا رهبری کېدل. وسله والو طالبانو لا په دې اړه څه نه دی ویلی. د یادونې وړ ده، چې درې ورځې وړاندې هم ناټو ځواکونو په بالامرغاب ولسوالۍ کې د وسله والو طالبانو یو شمېر مرکزونه بمبارد کړی وو، چې له کبله یې 7 تنو ته مرګ ژوبله اوښتې وه.