طالبانو د ملا عمر د ناروغۍ اوازې بې بنسټه وبللې

امریکایۍ ورځپاڼې واشنګټن پوسټ تیره ورځ د امریکا د بهرنیو چارو وزارت او دسې ای اې دیوې شخصی استخباراتی شبکې ایکلیپس ګروپ له قوله راپور ورکړى و،چې ګواکې ملاعمر د زړه د ناروغۍ له کبله دپاکستان په یوه روغتون کې بستر شوى. دغه استخباراتی شبکې د خپل خبر د کره والی لپاره هغه ډاکټر یاد کړى، چې ملا عمر یې له عملیات وروسته لیدلی و، خو یادې شبکې د ډاکټر نوم نه و په ډاګه کړى. یادې شبکې د ډاکټر له خولې ویلی، چې دى خپله په عملیاتو کې شریک نه و، خو له نورو ډاکټرانو یې اوریدلی، چې ملا عمر د زړه په ناروغۍ اخته دى. د طالبانو ویاند دیوې خپرې شوې خبر پاڼې له لارې دغه اوازې بې بنسټه وبللې او زیاته یې کړه، چې ملا عمرهېڅ ډول داسې ناروغی نلری، چې روغتون ته یې اړتیا پیدا شی. نوموړی دا ډول اوازې د دوى د دښمنانو کار وباله او زیاته یې کړه، چې دوى دا کار د دې لپاره کوی، څو له دې لارې په نظامی ډګر کې خپله ماته پټه او د عامو خلکو ذهن بل لورې ته واړوی. بلخوا پاکستانیو استخباراتو هم یاد شوى راپور رد کړى دى؛ په اسلام اباد کې د پاکستانی استخباراتو یوې سرچینې، چې نوم یی نه دى په ډاگه شوى ویلی، چې دا راپور بې اساسه او له حقیقت څخه لری دى، خو وتلى ژورنالست رحیم الله یوسفزى، چې له طالبانو سره نږدې اړیکې لری وایی، چې دا له امکانه لرې نه ده، چې ګوندې په کراچۍ کې د ملا عمر درملنه شوې وی. هغه ویلی، چې دا یوه منل شوې خبره ده، چې د ملا عمر او نورو طالب مشرانو درملنه د پاکستان په روغتونونو کې کېږی، ځکه چې دوى بل چرته نه شی تلاى.