د ملی پولیسو یو سرتېرى ووژل شو

ځایی امنیتی چارواکی وایی، چې په بادغیس ولایت کې د ماین د یوې چاودنې له کبله د ملی پولیسو یو سرتېرى ووژل شو. دغه پېښه نن سهار د یاد ولایت په مقر ولسوالۍ کې هغه مهال رامنځته شوه، چې د ملی پولیسو موټر په یوه ځاى پرځاى شوی ماین وربرابر شو. د بادغیس امنیه قومندان عبدالجبار صالح رسنیو ته ویلی، چې په دې پېښه کې د ملی پولیسو یو سرتېرى وژل شوى دى. د نوموړی د معلوماتو له مخې دغه یو ریموټ کنټرول ماین و، چې له لرې څخه کنټرولېده. د سرچینې په وینا، تر اوسه د پېښې په تړاو څوک نه دی نیول شوی، خو په اړه یې پلټنې روانې دی. بلخوا د وسله والو طالبانو ویاند قاری یوسف احمدی رسنیو ته ویلی دی، چې په دې پېښه کې د ملی پولیسو یو سرتېرى وژل شوى او څلور نور ټپیان دی.