صلح با حکمتیار مهم ترین دستاورد سید احمد گیلانی بود

رئیس جمهور غنی در مراسم خاکسپاری پیر سیداحمد گیلانی، از توافق صلح با گلبدین حکمتیار به عنوان بزرگترین دستاورد دولت و شورای عالی صلح به رهبری سید احمد گیلانی یاد کرد.
رئیس جمهور غنی گفت: با رهبری سید احمد گیلانی، روند صلح که از دوره حامد کرزی رئیس جمهور پیشین آغاز شده بود، به نتیجه رسید.
وی افزود: ما دستاوردی داشتیم که کرزی از ابتدا شروع کرد و آن توافق صلح با حزب اسلامی و حکمتیار، صورت گرفت.
اشرف غنی، از گیلانی به عنوان شخص صالح یاد کرد و درگذشت وی را به افغانستانی‌ها و خانواده گیلانی تسلیت گفت.
دیروز  مراسم خاکسپاری، پیر سیداحمد گیلانی، رئیس شورای عالی صلح و یکی از شخصیت‌های سیاسی و جهادی افغانستان در ولایت ننگرهار زادگاهش با حضور مقامات بلند رتبه دولتی برگزار شد.
پایگاه اطلاع رسانی ریاست جمهوری نوشت: نماز میت گیلانی در کاخ ریاست جمهوری به امامت عبدالرب رسول سیاف، یکی از چهره‌های سیاسی کشور با حضور رهبران دولت وحدت ملی، حامدکرزی، رئیس جمهور پیشین و شخصیت‌های سیاسی وجهادی برگزار شد.