جنگ جویان پاکستانی، ازبکستانی و تاجیکستانی طالبان در قندز می جنگند

فرمان‌دهی امنیه ولایت قندز می‌گوید که در حال حاضر در این ولایت، بیش از دو هزار طالب مسلح با نیروهای امنیتی افغان می‌جنگند که در بین آنان اعضای خارجی‌شان نیز شامل‌اند.
عبدالحمید حمیدی، فرمان‌ده امنیه ولایت قندز، در نشستی در آن ولایت گفت که جنگ‌جویان خارجی گروۀ طالبان که در این ولایت می‌جنگند شامل شهروندان پاکستان، ازبکستان و تاجیکستان‌اند.
آقای حمیدی از شمار جنگ‌جویان خارجی گروۀ طالبان که در ولایت قندز فعالیت دارند، اطلاعات به دست‌رس نمی‌دهد، اما می‌گوید که بیش از دو هزار طالب مسلح در این ولایت حضور دارند.
فرمان‌ده امنیه ولایت قندز می‌گوید که در سال جاری شمار زیادی از جنگ‌جویان طالبان که در این ولایت در نبرد با نیروهای دولتی بوده، در نتیجۀ عملیات‌های گوناگون نابوده‌ شده‌اند.
این درحالی‌ست که گروۀ طالبان گفته‌اند که افراد وابسته به این گروۀ در ولایت قندز حضور دارند؛ اما موجودیت اتباع خارجی که در بین آنان حضور داشته باشند را رد کرده‌اند.
قندز در شمال افغانستان از ناامن ترین ولایت‌‌ها به شمار می‌رود که در از چند سال بدینسو، دست‌خوش ناامنی‌های زیاد از سوی گروه‌های هراس‌افگن به شمول طالبان بوده‌‌است.
هرچند در این اواخر، عملیات‌های گستردۀ جهت نابودی طالبان در این ولایت راه‌اندازی گردیده بوده‌اند؛ اما این عملیات‌ها بدون سرنگون کردن هراس‌افگنان به پایان رسیده‌اند.
گفتنی‌ست که در افغانستان، فصل زمستانش به فصل سرکوب تروریستان معروف‌است که تا هنوز عملیات‌های زمستانی در ولایت قندز راه‌اندازی نشده‌اند.