رحمت الله نبیل؛ مقربین دربار غنی، دوسیه داران بزرگ حکومت سابق اند

رحمت‌الله نبیل، رییس پیشین امنیت ملی، می‌گوید 180 تن از پرونده‌داران مقامات حکومت قبلی، به منصب‌های بلند دولتی در حکومت فعلی رسیده‌اند.

آقای نبیل، روز گذشته (یک‌شنبه، 25 عقرب) در صفحه‌ی تویترش نوشت: «در سال 2014، پس از تشکیل حکومت وحدت ملی، به تعداد 180 پرونده (دوسیه) اختلاس/ فساد‌های بزرگ مقامات حکومت قبلی را به داکتر اشرف غنی سپردم».

وی می‌افزاید که این پرونده‌داران نه‌تنها که به پنجه‌ی قانون سپرده نشدند، در عوض به منصب‌های بلند دولتی مقرر شدند.

او می‌گوید این افراد تا کنون در ادارات دولتی ایفای وظیفه می‌کنند و در واقع از مقربین دربارند.