جنگ در بدخشان؛ بیش از یک هزار نیروی امنیتی به تاجیکستان عقب نشینی کردند

رسانه‌های تاجیکستانی به نقل از مرکز مطبوعات نیروهای مرزبانی کمیته دولتی امنیت ملی تاجیکستان گزارش داده‌اند که در پی حمله طالبان به ولسوالی‌های خواهان، شکی، نسی، ماه‌می، شغنان و اشکاشم که 910 کیلومتر مرز مشترک با این کشور دارد، یک هزار و 37 نیروی امنیتی افغانستان از مرز عبور کرده‌اند.

خبرگزاری خاور تاجکیستان روز دوشنبه، چهاردهم سرطان، هرچند گزارش داده است که ولسوالی‌های مزبور به دست طالبان افتاده است، اما منابع محلی می‌گویند که ولسوالی ماه‌می و دیگر ولسوالی‌های درواز به دست طالبان سقوط نکرده است.

هرچند نیروهای امنیتی از ولسوالی ماه‌می بیرون شده‌اند.

نهادهای امنیتی تاکنون در این مورد چیزی نگفته‌اند.

منابع محلی می‌گویند که بسیاری از ولسوالی‌های بدخشان بدون درگیری به طالبان واگذار شده است.

این منابع هم‌چنان می‌گویند که طالبان تجهیزات برخی از تاسیسات دولتی و نهادهای خیریه را با خود برده‌اند.

گروه طالبان تاکنون در این مورد چیزی نگفته است.

وزارت دفاع ملی روز گذشته از اعزام صدها نیروی کماندو به بدخشان خبر داد.

دفتر والی بدخشان می‌گوید که در پی حملات طالبان در نواحی شهر فیض‌آباد تلفات سنگین به گروه طالبان وارد شده است.

در پی تشدید نبردها در مرز با تاجیکستان، امام‌علی رحمان، رییس جمهور این کشور با محمداشرف غنی، رییس جمهور کشور، تلفنی گفت‌وگو کرد.

محمداشرف غنی گفته است که دولت افغانستان در قبال شهروندانش مسوول است و به زودی به وضعیت کسانی که به تاجیکستان رفته‌اند، رسیده‌گی می‌کند.