ولسمشر: وکیلان دې کاندید وزیرانو ته په رایې ورکولو کې ملی یووالى په پام کې ونیسی

ولسمشر حامد کرزی له ملی شورا سره ځانګړې غونډه کې غوښتنه وکړه چې ولسی جرګه دې کاندید وزیرانو ته د رایې په ورکولو کې د وړتیاوو ترڅنګ ملی یووالی هم په پام کې ونیسی. دا څرګندونې د ولسی جرګې دویم مرستیال شېخ نعمت الله غفاری پژواک خبری اژانس ته وکړې. د ده په وینا، ولسمشر تېر ځل له بېلابېلو قومونو څخه یو شمېر کسان د کاندید وزیرانو په توګه جرګې ته معرفی کړی وو؛ خو رایه یې تر لاسه نه کړه. د غفاری په وینا، ولسمشر وویل،ددې لپاره چې په دې برخه کې د هغه اندېښنه لرې شوې وی، توصیه کوی چې کاندید وزیرانو ته د رایې په ورکولو کې ملی یووالى هم په پام کې ونیسی. کرزی نن د جمهوری ریاست په ماڼۍ کې د ملی شورا د دواړو مجلسونو (ولسی جرګې او مشرانو جرګې) له غړو سره فوق العاده ناسته لرله. د سلواغې په 26مه، نهه کاندید وزیران د باور رایې د ترلاسه کولو په موخه ولسی جرګې ته وروپېژندل شوی دی او ټاکل شوې، چې جرګه په نږدې راتلونکی کې رایه ورکړی. د دې نوملړ له مخې، محمد اسماعیل د برېښنا او اوبو وزارت، انجنیر امیرزى سنګین د مخابراتو وزارت، ډاکټر ثریا دلیل د عامې روغتیا وزارت او ډاکټر حسن بانو غضنفر د ښځو چارو وزارت لپاره معرفی شوی دی. دغه راز د لوړو زده کړو وزارت لپاره ډاکټر عبیدالله عبید،د کلیو د پراختیا وزارت ته ویس احمد برمک، د ترانسپورت او هوایی چلند وزارت لپاره داوود علی نجفی، د ښار جوړونې وزارت ته حسن عبدالهى او د فواید عامې وزارت لپاره انجنیر نجیب الله اوجن جرګې ته ورپېژندل شوی دی. د کاندید وزیرانو په اړه په نننۍ ناسته کې د ولسمشر دا څرګندونې په داسې حال کې دی، چې د ولسی جرګې د مشر د تېرې ورځې د څرګندونو له مخې، ولسمشر دغه غونډه په بګرام کې د بهرنیو ځواکونو له خوا د قران کریم د نسخې د سوځولو په اړه ورغوښتې وه. کرزی له ملی شورا سره په ځانګړې نننۍ غونډه کې وویل، چې د قران کریم د سوځولو په اړه به د ټاکل شوی پلاوی تر څېړنې وروسته له ملی شورا سره په مشوره پرېکړه وکړی. د سرچینې د څرګندونو له مخې، کرزی ویلی چې د دې موضوع د څېړلو لپاره یې یو پلاوى بګرام ته استولى دى، چې نن مازیګر به بېرته راشی او د څېړنو پایلې به له ده سره شریکې کړی. په بګرام کې د قران کریم نسخې درې شپې مخکې سوځول شوې او په غبرګون کې یې له تېرو درېیو ورځو راهیسې د هېواد په مرکز او ځینو ولایتونو کې لاریونونه روان دی.