طالبان به دلیل نداشتن «ریش» و «لنگی» به کارمندان ادارات دولتی اجازه ی ورود ندادند

مأموران وزارت امر به‌معروف طالبان امروز به کارمندان چندین اداره‌ی دولتی به‌دلیل داشتن «ریش کوتاه» اجازه داخل شدن را نداده‌اند.

با این حال شماری از کارمندان این ادارات می‌گویند که طالبان به آنان گفته‌اند: «باید ریش گذاشته و لنگی سر کنید.»

یکی از این کارمندان  روایت می‌‌کند: «با بسیار بی احترامی طالبان می‌گویند که شکل شما به کفار می‌ماند.»

‏از جمله ادارات دولتی، از ورود کارمندان وزارت خارجه و وزارت مالیه به‌دلیل داشتن ریش کوتاه جلوگیری شده است.

شماری از آنان که اجازه‌ی داخل‌شدن به دفتر‌ها را دریافت کرده‌اند؛ می‌‌گویند که طالبان حتی تلفن‌های شان‌‌را قید می‌کنند و اجازه نمی‌‌دهند که تلفن‌ها را با خود به داخل دفتر ببرند.

پس از تسلط دوباره‌ی طالبان بر افغانستان، محدویت‌های گسترده‌ای در بخش‌های مختلف جامعه وضع شده است.