پنځه اربکیان له خپلو وسلو سره طالبانو ته تسلیم شول

د هلمند په مارجې ولسوالۍ کې پنځه اربکیان له څلور میله وسلو سره ددولت وسلوالومخالفینو ته تسلیم شوی دی. د مارجې ولسوال حاجی عبدالمطلب د وری په 4 مه پژواک خبری اژانس ته وویل چې تېر ماښام د مارجې په سیستانی سیمه کې د خداینور په نوم د اربکیو یو قوماندان له پنځه تنو سره ددولت مخالفینو ته تسلیم شوى ،خو طالبان دتسلیم شویو کسانو شمېر اته تنه ښیی. ولسوال وویل ، چې طالبانو ته تسلیم شوی کسان د سیستانی د سیمې اوسېدونکی وو اودیوې کورنۍ غړی دی،چې له ولسوالۍ او امنیه قوماندانۍ سره یې هیڅ اړیکې نه درلودې او د امریکایی سمندری ځواکونو لخوا په دنده ګومارل شوی وو. نوموړی زیاته کړه، چې په مارجې ولسوالۍ کې د مشترک تر عملیاتو وروسته 14سوه اوپنځوس اربکی او سیمه یزه پولیس په دندو ګومارل شوی و، چې وروسته 6 سوه تنه سیمه یزه پولیسوته جلب شوه او نور یې بې سرپرسته پاتې شول . د هغه په وینا،د مارجې ولسوالۍ په دښتی سیمو کې د طالبانو واک اوس هم شته او یاد کسان دطالبانو د واک ته تللی ،خو دوى یې په اړه پلټنې پیل کړې دی. ولسوال دا هم وویل چې طالبانو ته تللی کسان ټول په نشه یی توکو روږدی هم وو. بلخوا دطالبانو ویاند قاری یو سف احمدی پژواک ته په یوه ټېلېفونی پیغام کې ویلی ،چې اته اربکیان له اته میله وسلو اویوه کرولا موټر سره تېر ماښام ورته تسلیم شوی دی.