تاریخ انتشار: 1391/01/05 0:0کد خبر: 9319
په مشرانو جرګه کې د اروزګان پخوانى غړى ووژل شو
زمان تقریبی مطالعه: 2 دقیقه
امنیتی چارواکی وایی، چې په مشرانو جرګه کې د اروزګان پخوانى غړى د سړک د غاړې ماین په چاودنه کې له دوو ساتونکو او یوه قومی مشر سره ووژل شو.
د اروزګان ولایت د امنیه قوماندانۍ ویاند فرید عایل نن (د وری 5 مه) پژواک اژانس ته وویل، چې پر شاوخوا دوولس نیمو بجو د اروزګان د مرکز ترینکوټ اړوند د ده یک په سیمه کې په مشرانو جرګه کې د دې ولایت پخوانى غړى حاجی خیرو جان د سړک د غاړې ماین په چاودنه کې ووژل شو.
د هغه په وینا، په دې پېښه کې له حاجی خیرو جان سره یو ځاى د اروزګان یو قومی مشر حاجی شرف الدین او دوه پولیس ، چې د پخوانی سناتور ساتونکی وو، هم ووژل شول.
نوموړی وویل، چې پېښه هغه مهال رامنځ ته شوه، کله چې پخوانى سناتور خیرو جان له ترینکوټ ښار څخه د خپل کلی ده یک پر لور روان و.
د ترینکوټ ښار د لومړۍ حوزې امر دویم څارن ګل اغا پژواک اژانس ته وویل، چې دوى د وژل شویو کسانو جسدونه د اروزګان ملکی روغتون ته لېږدوی او له هغه وروسته به یې خپلو کورنیو ته وسپاری.
د ده په وینا، په یاده سیمه کې تل وسلوال طالبان د سړک پر غاړه ماینونه ځاى پر ځاى کوی.
د دې پېښې مسوولیت تراوسه چا پر غاړه نه دى اخیستى.
د یادونې ده ، چې څو میاشتې مخکې په ولسی جرګې د اروزګان د خلکو استازى هاشم وطنوال او پخوانى والى جان محمد خان په کابل کې د ځانمرګیو بریدکوونکیو لخوا وژل شوی وو.
- منبع: ایرکا خبری آژانس
- لینک کوتاه