د افغانستان د اسلامي جمهوریت جمهور رئیس حامد کرزي تیره ماښام په یوې درې اړخیزه ناسته کې د پاکستان له جمهور رئیس ښاغلي آصف علی زرداري او د بریتانیاله صدراعظم ښاغلي ډیوید کامرون سره وکتل. په دې کتنه کې د افغانستان، پاکستان او بریتانیا مشرانو په سیمه کې د سولې، ثبات او روان وضعیت، افغانستان او پاکستان تر منځ د ستراتیژیکو همکاریو په اړه او د افراطیت پر خلاف د مبارزې پر څرنګوالي خبرې اترې وکړې. حامد کرزي د پاکستان له جمهور رئیس سره د دواړو هېوادونو ترمنځ د اړیکو د لا پیاوړتیا پخاطر د ۲۰۱۳ کال تر پایه د افغانستان او پاکستان ترمنځ د ستراتیژیکو همکاریو د تړون مسودې پر نهايي کولو موافقه وکړه. په دې درې اړخیزه ناسته کې ، ښاغلي ډیوید کامرون ژمنه وکړه چې هېواد به یې په دې برخه کې د افغانستان او پاکستان له روانو هڅو په کلکه ملاتړ وکړي. همداراز ، حامد کرزي او آصف علی زرداري د دواړو هېوادونو د اړیکو د لا پیاوړي کولو په برخه کې د بريتانیا هېواد له رغنده رول نه قدرداني وکړه. ښاغلي زرداري ،په افغانستان کې د سولې او ثبات پر اهمیت باندې د ټینګار په ترڅ کې وویل چې تر لوی اختر وړاندې ، پاکستان ته د سولې دعالي شورا د پلاوي د راتګ په تمه دي او دا اقدام يې د سولې د بهیر د پرمختګ لپاره یو مهم ګام وباله. جمهور رئیس کرزي په تېرو کلونو کې د بریتانیا او پاکستان د دوامدرو مرستو او همکاریو له امله مننه وکړه. په پای کې پر دې موافقه وشوه چې د افغانستان او پاکستان د بهرنیو چارو وزیران به د دواړو هېوادونو تر منځ د ستراتیژیکو همکاریو د سند په اړه د بحثونه د دوام پخاطر او د دغه بهیر د پرمختګ ارزونې په موخه په نږدې راتلونکې کې سره لیده کاته وکړي.