<p style="text-align: justify;">اتاق تجارت و صنایع کشورمان در آستانه امضای توافقنامه ترانزیتی میان کابل، اسلام‌آباد و دوشنبه موسوم به «پتا»، آن را برای افغانستان بی‌‌ثمر می‌داند. <br />  توافقنامه ترانزیتی افغانستان، تاجیکستان و پاکستان موسوم به «پتا» به‌زودی میان این کشورها به امضا می‌رسد.<br /> مقامات وزارت اقتصاد و تجارت تاجیکستان می‌گویند: متن توافقنامه پتا میان نمایندگان بازرگانی افغانستان، پاکستان و تاجیکستان تکمیل شده و به‌زودی امضا خواهد شد.<br /> «سید رحمان نظروف» معاون وزارت اقتصاد و تجارت تاجیکستان در اجلاس نمایندگان این سه کشور که در در دوشنبه، پایتخت تاجیکستان برگزار شد، گفت: با امضای توافقنامه ترانزیتی پتا، میزان فعالیت‌های بازرگانی و تجاری میان افغانستان، پاکستان و تاجیکستان به پنج میلیارد دلار افزایش خواهد یافت.<br /> با امضای توافقنامه پتا پاکستان می‌تواند کالاهای خود را از طریق خاک افغانستان به تاجیکستان و آسیای میانه انتقال دهد.<br /> این در حالی است که اتاق تجارت و صنایع کشور در این باره اظهار داشت: امضای توافقنامه ترانزیتی پتا هیچ امتیازی برای افغانستان ندارد و تنها پاکستان از آن سود خواهد برد.<br /> «خان جان الکوزی» معاون اتاق‌های تجارت کشورمان خاطرنشان کرد: این توافقنامه نباید از سوی افغانستان به امضا برسد، زیرا در آن تنها منافع پاکستان دیده شده است.<br /> وی اذعان داشت: تاکنون پاکستان هیچ توجهی به مشکلات ترانزیتی بازرگانان و تجار افغانستانی در بندرهای «واگه» و «کراچی» نداشته و برای رفع آن اقدامی نمی‌کند.</p>