د افغانستان د سولې عالی شورا مشر جلال اباد ته پخپل سفر کې د سوله ییزو هڅو بریالیتوب ته د نړیوالې ټولنې د رېښتینی ملاتړ ژمنه اړینه وبلله او ټینګار یې وکړ، چې روانه جګړه د دولت وسله والو مخالفینو ته هم کومه ګټه نه رسوی. برهان الدین ربانی، چې د شورا یو شمېر غړو سره پرون جلال اباد ته راغلى و، د تړلو دروازو تر شا یې په شاهی ماڼۍ کې د ختیځ زون د څلور واړو ولایتونو والیانو او چارواکو سره د سوله ییزو هڅو په اړه خبرې وکړې. هغه په یوه خبری ناسته کې وویل، ننګرهار ته یې د سفر موخه دلته له خلکو سره د سولې مخته پر پرتو خنډونو او ختمولو یې خبرې، اترې دی. د سولې شور امشر د بهرنیو ځواکونو عملیاتو کې ولسی مرګ، ژوبله او د طالبانو په نامه د عامو خلکو ځورول هم له دې خندونو څخه یاد کړل. د جمهور رئیس سلاکاراو د سولې عالی شورا غړی معصوم ستانکزی بیا که څه هم د کومې ولسوالۍ نوم وانخیست خبری ناستې ته وویل: له نړیوال ملاتړه برخمنو سوله ییزو هڅو یې د هېواد په یو شمېر ولسوالیو کې امنیتی وضعیت راښه کړى. د سولې عالی شورا، چې له جوړېدو یې شاوخوا دوه میاشتې کېږی، چارواکو یې له ننګرهاره مخکې کندهار او هرات ته هم ورته سفرونه کړی او وایی، دا لړۍ به نوره هم په دې وغځوی، چې د دولت وسله والو مخالفینو سره د خبرو جوړېدونکې ستراتېژۍ ته یې نظرونه راټول کړی.