رسانه‌های تاجیکستانی، گزارش داده اند که بیش‌تر از 300 تن از نیروهای امنیتی افغانستان، پس از درگیری با جنگ‌جویان طالب در ولایت بدخشان، به تاجیکستان عقب‌نشینی کرده اند.

خبرگزاری خوار، روز شنبه -12 سرطان- به نقل از مرکز رسانه‌های نیروهای مرزی کمیته‌ی دولتی امنیت ملی تاجیکستان، گزارش داده است که نیروهای امنیتی افغانستان پس از درگیری با جنگ‌جویان طالب و مقاومت شدید در برابر این گروه، به خاطر حفظ نیروی بیش‌تر به خاک تاجیکستان عقب‌نشینی کرده اند.

در این گزارش، آمده است؛ مناطقی که در آن میان نیروهای امنیتی و جنگ‌جویان طالب درگیری جریان داشت، به گونه‌ی کامل در اختیار طالبان در آمده است؛ اما اوضاع مرزی تاجیکستان با افغانستان در کنترل مرزبان‌های تاجیکستانی قرار دارد.

ولایت بدخشان افغانستان، با تاجیکستان مرز مشترک دارد و به گفته‌ی منابع محلی، در دو روز گذشته، هفت ولسوالی این ولایت به دست طالبان سقوط کرده است.

در حال حاضر، ولسوالی‌های درایم، وردوج، تیشکان، کشم، تگاب، یفتل پایین و شهر بزرگ، در کنترل جنگ‌جویان طالب است.

این در حالی است که پیش از این نیز، در نتیجه‌ی درگیری‌ها در ولایت کندز، 134 نفر از نیروهای امنیتی افغانستان، از ‏طریق شیرخان‌بندر، وارد خاک تاجیکستان شدند‎.‎

به دنبال ادامه‌ی درگیری‌ها در ولایت بلخ نیز، گفته می‌شد که 17 سرباز امنیتی پس از درگیری با ‏جنگ‌جویان طالب، به خاک تاجیکستان پناه برده اند؛ اما محمدفرهاد عظیمی، والی بلخ، این موضوع را رد کرد.