په جوزجان ولایت کې د ملی اردو 3 سرتیرو ته هغه مهال مرګ ژوبله واوښته، چې موټر یې د سړک د غاړې پر ایښودل شوی ماین برابر شو. یاده پېښه تېره ورځ د جوزجان ولایت په قوش تپه ولسوالۍ کې رامنځته شوه. د جوزجان ولایت امنیه قوماندان مل پاسوال عبدالعزیز غیرت کلید ته د ټلیفون پر لیکه وویل، چې تېره ورځ له غرمې وروسته د ملی اردو یو سترتېرى هغه مهال مړ او 2 نور ټپیان شول، چې موټر یې د سړک د غاړې پر ماین وخوت. د پېښه پړه وسله والو طالبانو پر غاړه اخیستې او په اړه یې رسنیو ته ویلی، چې په دغه پېښه کې یې د ملی اردو یو ټانګ او پکې سپاره ټول سرتیری له منځه وړی. د یادونې وړ ده، چې له درې ورځو راهیسې، د جوزجان ولایت په درزاب او قوش تپه ولسوالیو کې د امنیتی ځواکونو او وسله والو مخالفینو ترمنځ جګړه روانه ده، چې د چارواکو په وینا، تر دا مهاله یې څو کلی له مخالفینو پاک کړی دی.