قران کریم ته د سپکاوی په غبرګون په کابل او یو شمېر ولایتونو کې د هغو لاریونونو په پایله کې چې نن ترسره شول، د دوو بهرنیو سرتېرو په ګډون 9 تنه ووژل شول او 51 نور ټپیان شول. امریکایی ځواکونو درې شپې مخکې د قران کریم څلور نسخې د پروان ولایت د بګرام په هوایی ډګر کې وسوځولې، چې دغه کار د خلکو غوسه راوپاروله او د لاریونونو لامل شوى دى. نننی لاریونونه د کابل د بګرامیو په ولسوالۍ، د ننګرهار په مرکز جلال اباد ښار او د خوګیاڼیو او بټی کوټ ولسوالیو، د لغمان په مرکز مهترلام، په قرغیو او الینګار ولسوالیو، د فاریاب په مرکز په میمنې ښار او د بغلان ولایت د مرکزی بغلان ولسوالۍ کې ترسره شول. همدارنګه د اروزګان ولایت په دهراوود ولسوالۍ، د میدان وردګو په مرکز میدان ښار، د لوګر ولایت په خوشی ولسوالۍ، د کاپیسا په نجراب ولسوالۍ او همدارنګه د جوزجان او هرات په ولایتونو کې لاریونونه پر لاره اچول شوی، چې ځینې یې پر تاوتریخوالی اوښتی او مرګ ژوبله یې رامنځ ته کړې ده. د هغو شمېرو له مخې چې پژواک خبری اژانس له خپلو نننیو راپورونو څخه ترلاسه کړی، په ټولیزه توګه 9 تنه وژل شوی او 51 نور ټپیان دی. د خوګیاڼیو ولسوالۍ په لاریون کې دوه لاریون کوونکی او دوه امریکایی سرتېری وژل شوی دی. خو ایساف وایی چې د دوى یو سرتېرى د افغانستان په ختیځ کې، د یو کس له خوا چې د ملی اردو یونیفورم یې درلود، وژل شوى دى. په همدې حال کې د ننګرهار د والی ویاند وایی، چې د ایساف دغه عسکر د خوګیاڼو ولسوالۍ د خلکو د لاریون په ترڅ کې د ملی اردو د یوه سرتېری له خوا وژل شوى دى. د اروزګان ولایت د دهراوود ولسوالۍ په لاریون کې درې لاریون کوونکی، د مرکزی بغلان ولسوالۍ په لاریون کې یو تن او په لغمان ولایت کې هم یو تن وژل شوى دى. د ننګرهار په خوګیاڼو او بټی کوټ ولسوالیو او د لغمان د مرکز مهترلام په لاریونونو کې 18 تنه ټپیان شوی او همدارنګه د فاریاب ولایت د مرکز د میمنې په ښار کې د لاریون کوونکو په منځ کې د یولاسی بم د چاودنې له امله 12 تنه ټپیان شوی دی. همدارنګه په دهراوود ولسوالۍ کې 12 تنه (شپږ لاریون کوونکی او شپږ د ملی اردو او پولیسو سرتېری)، په بغلان کې د دوو پولیسو په ګډون څلور تنه، د کاپیسا په نجراب ولسوالۍ کې دوه تنه او د کابل په بګرامیو کې دوه تنه او یو پولیس ټپیان شوی دی. د یادونې وړ ده، چې په کابل او یو شمېر نورو ولایتونو کې د تېرې ورځې په لاریونونو کې اووه تنه وژل شوی او د درېیو پولیسو په ګډون 30 تنه ټپیان وو.