ناټو: طالب مشر ملا محمد عمر په پاکستان کې اوسی

د ناټو یوه چارواکی په کابل کې رسنیو ته ویلی، چې د وسلوالو طالبانو مشر ملا محمد عمر په پاکستان کې ژوند کوی. هغه په ځانگړی ډول کوېټه یا کراچۍ ښار د هغه د استوگنځی په نامه یاد کړى دى. دغه چارواکی، چې د خپل نوم له اخېستو یې ډډه کړې، دا رد کړې، چې گواکې ملا محمد عمر په افغانستان کې دننه د جنگېدونکو وسلوالو طالبانو مشری کوی. هغه وویل د طالبانو مشران له پاکستانه د طالبانو مشری کوی. د دغه چارواکی په وینا، د طالبانو له لوری د افغانستان بېلابېلو ولایتونو ته ټاکل شوی والیان په سلو کې نوی په پاکستان کې ژوند کوی. د ناټو دغې څارګرې سرچینې دا هم ویلی، له پاکستانه یې د طالب مشرانو د نیولو غوښتنه کړې، خو په دې برخه کې ور سره مرسته نه ده شوې. د ناټو دغه چارواکی ټینگار کړى، چې د ایران او پاکستان څارګرې ادارې په افغانستان کې د جگړې اور ته لمن وهی او د حکومت وسلوال مخالفان پیاوړی کوی. پاکستان د ناټو د دغه چارواکی څرگندونو ته تر دې مهاله غبرگون نه دى ښوولى.