د هسپانیا صدراعظم ناببره افغانستان ته راغی

د هسپانيا صدراعظم په يوه نا اعلان شوي سفر افغانستان ته راغلى دى. د هسپانوي رسنیو په حواله چې له صدراعظم "مريانو راجوى" سره په دغه سفر کې د دفاع وزير "پيډرو مورينس" هم ملتيا کوي. سرچينې زياته کړې، چې د هسپانيا صدراعظم به د افغانستان له ولسمشر حامد کرزي او په دغه هېواد کې له خپلو سرتېرو سره هم وګوري. تېر کال د هسپانيا د صدراعظم په توګه تر ټاکل کېدو وروسته افغانستان ته د مريانو دا لومړى سفر دى. هسپانيا په افغانستان کې د ايساف تر چتر لاندې ١٦٠٥ سرتېري لري؛ چې په لوېديځو ولايتونو (هرات، فراه او بادغيس) کې مېشت دي. تر اوسه په افغانستان کې د هسپانتيا ٣٤ سرتېري وژل شوي دي.