د دفاع وزارت 22 تنه لوړ رتبه افسران تبدیل شول

په هېواد کې د ډاډمن امنیت د ټینګښت په هدف د کورنیو چارو په وزارت کې تر پراخو تغییراتو وروسته په دفاع وزارت کې هم څه باندې شل تنه لوړ رتبه چارواکی تبدیل شوی دی. د دفاع وزارت وایی، چې دا بدلونونه د دې وزارت په چوکاټ کې د اصلاحاتو او د کارونو د ښه او منظم پرمخ وړلو په هدف د جمهور رئیس کرزی په منظورۍ راغلی دی. د دې وزارت ویاند جنرال ظاهرعظیمی وایی، چې د دفاع وزارت په چوکاټ کې دوه ویشت تنه لوړ رتبه چارواکی تبدیل شوی، چې د سېلاب، اتل او ظفر قول اردوګانو قومندانان هم په کې شامل دی. دا په داسې حال کې ده، چې تېره اوونۍ په کورنیو چارو وزارت کې هم د نشه یی توکو پر وړاندې د مبارزې د مرستیال په ګډون نږدې شل تنه لوړ رتبه چارواکی تبدیله شول. افغان حکومت وایی، چې دا بدلونونه د امنیتی چارو د ښه سمون او پرمخ بېولو په هدف راغلی دی.